30.12.11 საქართველოს პროფესიული კავშირების გაერთიანების თავმჯდომარემ დღეს, მედიისთვის, 2011 წელი შეაჯამა.

პროფკავშირებმა ჟურნალისტებს წარუდგინა 47–გვერდიანი ანგარიში წელს გაწეული ძირითადი საქმიანობების შესახებ. მასში შევიდა: პროფკავშირების მიერ 2011 წელს გამართული აქციები, გაფიცვები, პარლამენტში უკვე შეტანილი ახალი საკანონმდებლო ინიციატივები, პროფკავშირების მიერ მოქალაქეებისთვის გაწეული იურიდიული დახმარება, წარმატებული სასამართლო პროცესები, ორგანიზაციის მიერ განხორციელებული ანალიტიკური საქმიანობა, შრომის უსაფრთხოების თვალსაზრისით არსებული ვითარება, წარმატებული კოლექტიური ხელშეკრულებები, პროფკავშირებზე განხორციელებული ზეწოლა, პროფკავშირების საქმიანობა საერთაშორისო ასპარეზზე, პროფკავშირების მონაწილეობით გამართული საერთაშორისო კონფერენციები, სოციალური დიალოგის მიმდინარეობა, პროფკავშირული კადრების განათლება, ახალი პროფკავშირული ორგანიზაციები, ახალგაზრდული პროფკავშირული მოძრაობა.  

„ურთულესი წელი გვქონდა, ურთულესი გამოწვევების წინაშე იყო საქართველოს პროფკავშირები, მთლიანად, ყველა დარგი, ყველა წევრი, ყველა ლიდერი,“ – განაცხადა საქართველოს პროფკავშირების გაერთიანების თავმჯდომარემ ანგარიშის პრეზენტაციაზე, – „მიუხედავად ამისა, ვფიქრობ, რომ ორგანიზაციამ გაართვა თავი პრობლემებს. ამას, ნაწილობრივ, ადასტურებს IRI–ის ბოლო გამოკითხვაც, რომლის მიხედვითაც, პროფკავშირების ისტორიაში პირველად, ორგანიზაციისადმი ნდობის რეიტინგი 30%–ია. ას ადამიანზე გადათვლით, ეს ყოველი მესამე ადამიანის ნდობას ნიშნავს, რაც კარგი შედეგი იქნებოდა ნებისმიერი ევროპული ქვეყნისთვისაც.“

წლის ბოლო შეხვედრა ჟურნალისტებთან ფურშეტით დასრულდა.