22.12.11 საქართველოს პროფკავშირების გაერთიანება დღეს, 22 დეკემბერს, გაერთანების სხდომათა დარბაზში, საქართველოში მოქმედ არასამთავრობო ორგანიზაციებთან აწყობს შეხვედრას, რომელზეც საქართველოს პარლამენტში წელს შეტანილ კანონპროექტებს წარადგენს.

ფრიდრიხ ებერტის ფონდის ხელშეწყობით, სქართველოს პროფკავშირებმა წელს მოამზადა და პარლამენტში განსახილველად შეიტანა ორი საკანონმდებლო ინიციატივა – “ზოგადი განათლების შესახებ კანონში ცვლილებებისა და დამატებების შესახებ” და ‘’სახელმწიფო კომპენსაციისა და სტიპენდიის შესახებ კანონში ცვლილებებისა და დამატების შესახებ’’.

პირველი კანონპროექტი სტუდენტებისთვის, უმაღლესი განათლების სამივე საფეხურზე, ჯანმრთელობის უფასო დაზღვევას ითვალისწინებს; მეორე – მძიმე, მავნე და საშიშ პირობებში დასაქმებული ადამიანებისთვის, სამსახურიდან მათი წასვლის შემდეგ, სტაჟისა და მძიმე, მავნე და საშიში საქმიანობის შესაბამისი კომპანსაციის დანიშვნას.

ამ საკანონმდებლო ინიციატივების მხარდასაჭერად, საქართველოს პროფკავშირებმა დაიწყო, თითოეულისთვის, მოქმედი კანონით განსაზღვრული 30 000 ხელმოწერის შეგროვება. დღეისთვის დაგეგმილი შეხვედრა კანონპროექტების საფუძვლიანად განხილვისა და სამოქალაქო საზოგადოების მხარდაჭერის მოპოვების მიზნით იმართება.

შეხვედრაში მონაწილეობას მიიღებენ: ახალგაზრდა იურისტთა ასოციაცია, ორგანიზაცია „კონსტიტუციის 42–ე მუხლი“, „საერთაშორისო გამჭვრივალობა – საქართველო“, საზოგადოების კვლევის ცენტრი, საზოგადოებრივი დამცველი, „მრავალეროვანი საქართველო“, ფრიდრიხ ებერტის ფონდი, სხვა არასამთავრობო ორგანიზაციები.