21.02.12 საქართველოს პროფესიული კავშირების გაერთიანებისთვის ცნობილი გახდა, რომ „სახელმწიფო პენსიების შესახებ“ კანონში ცვლილებები და დამატებები შედის. ცვლილებების ინიციატორი და შესაბამისი სამუშაო პროექტის ავტორია საქართველოს შრომის, ჯანმრთელობისა და სოციალური დაცვის სამინისტრო, თუმცა, მიუხედავად მოთხოვნისა, ინფორმაცია დაგეგმილ ცვლილებებთან დაკავშირებით,  საქართველოს პროფკავშირებს ამ უწყებიდან არ მიაწოდეს.

საქართველოს პროფკავშირებისთვის ცნობილია, რომ  კანონში „სახელმწიფო პენსიის შესახებ“ დაგეგმილი ცვლილებებით, ამ კანონის ბენეფიციარები იქნებიან მხოლოდ ასაკით პენსიონერები და მხოლოდ მათზე გავრცელდება სამედიცინო დაზღვევის ახალი პაკეტი. განსახილველი პროექტის სამუშაო ვარიანტში არ ფიგურირებენ სხვა ბენეფიციარები – მარჩენალდაკარგულები და შეზღუდული შესაძლებლობების მქონე (შშმ) პირები, გაურკვეველია პენსიებით მათი უზრუნველყოფის მექანიზმები.

საქართველოს პროფკავშირები მიიჩნევს, რომ დაგეგმილმა ცვლილებებმა, ღიად არ უნდა დატოვოს მარჩენალდაკარგულებისა და შშმ პირების საპენსიო უზრუნველყოფის საკითხი. ამასთან, უნდა შეიცვალოს ჩანაწერი ცვლილებების პროექტის სამუშაო ვარიანტში და სამედიცინო დაზღვევის ახალი პაკეტით სარგებლობის უფლება სახელმწიფო პენსიის ყველა ბენეფიციარს უნდა მიენიჭოს. სხვა მხრივ, სახელმწიფო არათანაბარ პირობებში ჩააყენებს ადამიანებს, ვისთვისაც მისი ზრუნვა ერთნაირად მნიშვნელოვანია.

პროფკავშირებისთვის მიუღებელია, შშმ პირებისა და მარჩენალდაკარგულების სამედიცინო დაზღვევის, შესაბამისი შემწეობისა და პენსიის გარეშე დატოვება, მით უმეტეს, რომ საწარმოო უბედური შემთხვევების დინამიკა, ამ შემთხვევების შედეგად დასახიჩრებულთა და გარდაცვლილთა რაოდენობა, ბოლო პერიოდში, მზარდია.  

საქართველოს პროფკავშირები იმედოვნებს, რომ ხელისუფლება გაითვალისწინებს ყველა ამ მოსაზრებას და ქვეყნის მოსახლეობის ერთ–ერთ ყველაზე მოწყვლად ნაწილს შესაბამისი სოციალური გარანტიებით უზრუნველყოფს.